聖誕新年快車次輪壓軸戲上演「倫敦打吡」，水晶宮主場迎戰熱刺。雙方都經歷聯賽2連敗，急於反彈，預料進攻態度都會積極，今場睇好會多波入，不過唔係因為兩軍前鋒叻，相反只係防守曳、失誤多，2.5球嘅入球大值得投注。（Now 621周一凌晨零時30分直播）文:臻贏特
今仗兩軍都係上季錦標得主，水晶宮係英格蘭足總盃盟主，熱刺就稱霸歐霸盃。今季兩軍走勢唔同，水晶宮仲算Keep到，未計周日賽事排第8，同第4嘅車路士只係相差3分，熱刺冇咗孫興民就頭痕喇，依家只係排14。
兩軍近況都曳，水晶宮上周中英聯盃射輸12碼畀阿仙奴8強止步，近4場賽事只得2和2負，包括聯賽接連輸畀曼城同列斯聯，至於熱刺亦係聯賽2連敗，上場主場鬥利物浦輸1比2之餘，前鋒沙維西蒙斯同後衞基斯甸羅美路食紅牌，今場雙雙停賽。
防線穿窿連場勁失
今場雙方都急於求反彈，不過兩軍防守都唔係好掂，水晶宮近4場失咗10球，今場唯一利好消息，就係對手熱刺防守更加不濟。熱刺近期作客表現慘不忍睹，近5場只得1和4負，合共失咗16球，而且水晶宮由2021年至2024年，連續4年嘅最後一場聯賽全部贏波，今場都會有信心搶攻，預料兩邊後防都會多失誤，甚至有機會出現烏龍波，加上熱刺所有賽事近10場，9次開3球或以上，2.5球嘅入球大玩得過。
