守強攻弱Vs穩陣行先 廣島新潟細均力敵

女子日職前列分子廣島三箭女足，主場迎戰新潟天鵝女足。廣島三箭女足入球能力唔算太強，但後防硬淨，連盃賽在內，近3場均以1比0擊敗對手，球隊於主場防守更加嚴密，近7場聯賽主場，6次開2球或以下，推介2.5球入球細。（周一下午1時開賽）

廣島三箭女足入球能力唔算強，聯賽4戰只入7球，不過勝在防守紀律性高，女子日職只失過兩球，特別之處係失嘅兩球雖然喺唔同比賽，但一球係開波1分鐘，另一球係下半場1分鐘，所以只要佢哋集中精神唔喺上、下半場初段失守，等閒球隊都幾難射得入佢哋。

近年交手入球偏少
新潟天鵝女足最近3場聯賽錄得1和2負，今仗為免再度全失3分，作客出擊肯定會以穩行先。翻查紀錄，其實兩軍近7次對賽，法定時間各贏兩次及打和3次，大家不落下風，近4次交手亦有3次開2球或以下，預料今場都係少入波場合，捧入球細啱數。文:渡邊年