盧頓主場例擺鐵桶
近期成績急插水嘅曼城將於今晚英超作客盧頓。上季冠軍曼城已連續4場失分，至於新升班球隊盧頓踢法硬朗，對住傳統勁旅，表現亦唔失禮，特別係上半場有氣有力，可以抵擋曼城強攻，中位數1.5球嘅半場細值博。（Now 621周日晚10時直播）
曼城近4場英超僅3和1負，雖然當中對手包括3支名牌球隊車路士、利物浦、熱刺，但車仔同熱刺人腳不整兼狀態欠佳，「藍月亮」咁都贏唔到，實在講唔通，上仗作客阿士東維拉，更加全場捱打，只有2次射門，最終以0比1敗陣。
近4仗英超3和1負
種種迹象都反映曼城球員狀態進入調整期，預料需要花一段時間先至可以重拾水準，加上射手艾寧夏蘭特近兩場都食白果，腳風唔順，今仗要攻入盧頓大門，並非易事。
盧頓雖然係護級分子，但近期屢有佳作，包括打和利物浦1比1，僅以0比1不敵曼聯，上仗主場鬥榜首阿仙奴，踢到補時先至失第4球，輸3比4，可見佢哋遇上傳統豪門，都毫不怯場。同埋盧頓上半場防守非常穩陣，門將湯馬士卡明斯基上月對水晶宮，連環撲救，當選11月英超最佳撲救，愈踢愈有信心，加上盧頓近9場英超有8場上半場總入球開出1球或以下，不妨博中位數1.5球嘅半場細。
