英超球隊出戰今屆歐洲3大盃賽，最令人驚喜一定係般尼茅夫，保持歐霸盃3戰全勝，計埋本土賽事在內，已連續6場淨贏2球或以上，兼且未有失波，最犀利係全部上半場領先，演出簡直無懈可擊，今晚歐霸作客布拉格斯巴達，一於直取半場客勝。

（Now 643周五凌晨1時45分直播）文:臻贏特

般尼茅夫雖然今夏有主帥伊拉奧拿轉投利物浦，但德國籍新領隊馬高路斯亦係有料之人，採取壓迫性踢法，非常適合呢支體力型球隊，成績愈來愈好，上輪歐霸盃對AC米蘭、英超作客曼聯，同樣大勝3比0。英聯盃遇上歐聯分子阿士東維拉，同樣贈對方3蛋，表現攻守兼備。般茅已打出信心同士氣，勒都勒唔住，勝仗應該陸續有來。

布拉格斯巴達有恐英症
至於捷克球隊布拉格斯巴達今屆歐霸盃3戰1勝1和1負，而且對手只係艾拉華特阿美尼亞、利尼史特朗、奧林比亞高斯，實力唔可以同般尼茅夫相提並論，今仗勢必面臨沉重壓力。翻查紀錄，布拉格斯巴達近3次歐洲賽對英超兵團，全部大敗4球或以上，恐怕就算今場有地利，亦都難逃一敗。