日職免費直播重頭戲，鹿島鹿角對名古屋鯨魚。鹿角上周開鑼戰反勝橫濱水手4比3，加上近4次同鯨魚交手，鹿角錄得3勝1和，明顯格食格；名古屋鯨魚首仗主場多踢1人下0比1輸畀清水心跳，表現令人失望，士氣高昂嘅鹿角主勝屬信心之選。（無綫82台周六下午5時直播）文:邪神

鹿島鹿角貴為上季日職冠軍，百年構想東區冠軍及總亞軍，上星期聯賽開鑼戰幾乎甩轆，對住實力今非昔比嘅橫濱水手大部分時間落後，戰至下半場81分鐘，仍然落後1比3絕境下爆發小宇宙，喺末段連入3球反勝4比3，巴西射手里奧施亞拉同後備奇兵卡夫歷各自梅開二度，可見球隊對勝利非常執着。

鯨魚攻不銳守不穩
名古屋鯨魚首戰失利，士氣受挫，1號門將丹尼爾舒密特仍然養傷，今仗繼續由日本U21門將阿歷斯比辛奴把關，後防存在隱憂，要抵擋鹿角進攻有一定困難，至於該隊進攻主力山岸祐也同馬迪奧斯卡斯迪路上仗演出略為遜色，短期內難望提升表現。再睇雙方近4次交手鹿角取得3勝1和未輸過，包括上季雙殺鯨魚，擺明食住對手，加上剛於首輪反勝氣勢正盛，主勝走唔甩。