英超夏季系列賽，利物浦與列斯聯於美國芝加哥鬥法。「紅軍」於新帥伊拉奧拿帶領下，重現高位逼搶同主攻踢法，熱身賽首戰大炒新特蘭4比2可見一斑，最重要係球員搵番永不言敗嘅精神面貌，即使熱身賽都認真處理。事實上，「紅軍」近8場熱身賽，獲7勝1負佳績，今場鬥列斯聯有力再下一城。（周一凌晨3時開賽）文:渡邊年

利物浦雖然有多名球員參與世盃後休息仲未報到，但熱身賽首戰仍以4比2大勝新特蘭，上仗亦以1比0擊敗域斯咸，伊拉奧拿上任後即獲兩連勝。伊拉奧拿上季執教般利茅夫有辦你睇，就係一個字——「攻」，利用不斷走位同逼搶，帶般茅取得第6名，依家手執「紅軍」班兵，質素過之亦無不及，肯定攻到你暈。

伊拉奧拿嘅戰術，喚醒番利物浦球員體內嘅進攻DNA，鬥新特蘭從領先到落後再反勝，就係「紅軍」一向認真賣命嘅比賽態度，呢個傳統亦令佢哋喺近年嘅季前熱身賽取得好成績，連同今夏2場，近8場熱身賽贏7場，絕對唔會Hea球迷。伊拉奧拿賽前更揚言，今場會盡出正選，擺明同對手搏命。

列斯防線鬆散頂唔住
列斯聯前鋒卡維特利雲季前訓練受傷，今場都未必可以上陣，佢哋兩場熱身先以2比3不敵域斯咸，上仗鬥新特蘭以1比0險勝。領隊丹尼爾法基喺買人方面頻頻遇到挫折，暫時只從薩斯索羅收購中堅梅哈利莫域及免費從富咸簽入夏里威爾遜，整體實力有待提升，而且球隊後防鬆散，未必頂得住利物浦強攻，「紅軍」值得睇高一線。